శ్రీవిష్ణుసహస్రనామస్తోత్రం –
ఉత్తరపీఠిక
|| ఉత్తరన్యాసః ||
శ్రీ భీష్మ ఉవాచ-
ఇతీదం కీర్తనీయస్య కేశవస్య మహాత్మనః | నామ్నాం సహస్రం దివ్యానామశేషేణ ప్రకీర్తితమ్ || ౧ ||
య ఇదం శృణుయాన్నిత్యం యశ్చాపి పరికీర్తయేత్ | నాశుభం ప్రాప్నుయాత్కించిత్సోఽముత్రేహ చ
మానవః || ౨ ||
వేదాంతగో బ్రాహ్మణః స్యాత్క్షత్రియో విజయీ భవేత్ | వైశ్యో ధనసమృద్ధః స్యాచ్ఛూద్రః
సుఖమవాప్నుయాత్ || ౩ ||
ధర్మార్థీ ప్రాప్నుయాద్ధర్మమర్థార్థీ చార్థమాప్నుయాత్ | కామానవాప్నుయాత్కామీ ప్రజార్థీ
చాప్నుయాత్ప్రజామ్ || ౪ ||
భక్తిమాన్ యః సదోత్థాయ శుచిస్తద్గతమానసః | సహస్రం వాసుదేవస్య నామ్నామేతత్ప్రకీర్తయేత్ || ౫ ||
యశః ప్రాప్నోతి విపులం జ్ఞాతిప్రాధాన్యమేవ చ | అచలాం శ్రియమాప్నోతి శ్రేయః ప్రాప్నోత్యనుత్తమమ్ || ౬ ||
న భయం క్వచిదాప్నోతి వీర్యం తేజశ్చ విందతి | భవత్యరోగో ద్యుతిమాన్బలరూపగుణాన్వితః || ౭ ||
రోగార్తో ముచ్యతే రోగాద్బద్ధో ముచ్యేత బంధనాత్ | భయాన్ముచ్యేత భీతస్తు ముచ్యేతాపన్న ఆపదః || ౮ ||
దుర్గాణ్యతితరత్యాశు పురుషః పురుషోత్తమమ్ | స్తువన్నామసహస్రేణ నిత్యం భక్తిసమన్వితః || ౯ ||
వాసుదేవాశ్రయో మర్త్యో వాసుదేవపరాయణః | సర్వపాపవిశుద్ధాత్మా యాతి బ్రహ్మ సనాతనమ్ || ౧౦ ||
న వాసుదేవభక్తానామశుభం విద్యతే క్వచిత్ | జన్మమృత్యుజరావ్యాధిభయం నైవోపజాయతే || ౧౧ ||
ఇమం స్తవమధీయానః శ్రద్ధాభక్తిసమన్వితః | యుజ్యేతాత్మసుఖక్షాంతిశ్రీధృతిస్మృతికీర్తిభిః || ౧౨ ||
న క్రోధో న చ మాత్సర్యం న లోభో నాశుభా మతిః | భవంతి కృత పుణ్యానాం భక్తానాం పురుషోత్తమే || ౧౩ ||
ద్యౌః సచంద్రార్కనక్షత్రా ఖం దిశో భూర్మహోదధిః | వాసుదేవస్య వీర్యేణ విధృతాని మహాత్మనః || ౧౪ ||
ససురాసురగంధర్వం సయక్షోరగరాక్షసమ్ | జగద్వశే వర్తతేదం కృష్ణస్య సచరాచరమ్ || ౧౫ ||
ఇంద్రియాణి మనో బుద్ధిః సత్త్వం తేజో బలం ధృతిః | వాసుదేవాత్మకాన్యాహుః క్షేత్రం క్షేత్రజ్ఞ ఏవ చ || ౧౬ ||
సర్వాగమానామాచారః ప్రథమం పరికల్పతే | ఆచారప్రభవో ధర్మో ధర్మస్య ప్రభురచ్యుతః || ౧౭ ||
ఋషయః పితరో దేవా మహాభూతాని ధాతవః | జంగమాజంగమం చేదం జగన్నారాయణోద్భవమ్ || ౧౮ ||
యోగో జ్ఞానం తథా సాంఖ్యం విద్యాః శిల్పాది కర్మ చ | వేదాః శాస్త్రాణి విజ్ఞానమేతత్సర్వం జనార్దనాత్ || ౧౯ ||
ఏకో విష్ణుర్మహద్భూతం పృథగ్భూతాన్యనేకశః | త్రీంల్లోకాన్వ్యాప్య భూతాత్మా భుంక్తే విశ్వభుగవ్యయః || ౨౦ ||
ఇమం స్తవం భగవతో విష్ణోర్వ్యాసేన కీర్తితమ్ | పఠేద్య ఇచ్ఛేత్పురుషః శ్రేయః ప్రాప్తుం సుఖాని చ || ౨౧ ||
విశ్వేశ్వరమజం దేవం జగతః ప్రభుమవ్యయమ్ | భజంతి యే పుష్కరాక్షం న తే యాంతి పరాభవమ్ || ౨౨ || న తే యాంతి పరాభవమ్ ఓమ్ నమ ఇతి |
అర్జున ఉవాచ-
పద్మపత్రవిశాలాక్ష పద్మనాభ సురోత్తమ | భక్తానామనురక్తానాం త్రాతా భవ జనార్దన || ౨౩ ||
శ్రీభగవానువాచ-
యో మాం నామసహస్రేణ స్తోతుమిచ్ఛతి పాండవ | సోహఽమేకేన శ్లోకేన స్తుత ఏవ న సంశయః || ౨౪ || స్తుత ఏవ న సంశయ ఓమ్ నమ ఇతి |
వ్యాస ఉవాచ-
వాసనాద్వాసుదేవస్య వాసితం భువనత్రయమ్ | సర్వభూతనివాసోఽసి వాసుదేవ నమోఽస్తు తే || ౨౫ || శ్రీ వాసుదేవ నమోఽస్తుత ఓమ్ నమ ఇతి |
పార్వత్యువాచ-
కేనోపాయేన లఘునా విష్ణోర్నామసహస్రకమ్ | పఠ్యతే పండితైర్నిత్యం శ్రోతుమిచ్ఛామ్యహం ప్రభో || ౨౬ ||
ఈశ్వర ఉవాచ-
శ్రీరామ రామ రామేతి రమే రామే మనోరమే | సహస్రనామ తత్తుల్యం రామ నామ వరాననే || ౨౭ || శ్రీరామనామ వరానన ఓమ్ నమ ఇతి |
బ్రహ్మోవాచ-
నమోఽస్త్వనంతాయ సహస్రమూర్తయే సహస్రపాదాక్షిశిరోరుబాహవే | సహస్రనామ్నే పురుషాయ శాశ్వతే సహస్రకోటీ యుగధారిణే నమః || ౨౮ || సహస్రకోటీ యుగధారిణే ఓమ్ నమ ఇతి |
సంజయ ఉవాచ- యత్ర యోగేశ్వరః కృష్ణో యత్ర పార్థో ధనుర్ధరః | తత్ర శ్రీర్విజయో భూతిర్ధ్రువా
నీతిర్మతిర్మమ || ౨౯ ||
శ్రీభగవానువాచ-
అనన్యాశ్చింతయంతో మాం యే జనాః పర్యుపాసతే | తేషాం నిత్యాభియుక్తానాం యోగక్షేమం వహామ్యహమ్ || ౩౦ ||పరిత్రాణాయ సాధూనాం వినాశాయ చ దుష్కృతామ్ | ధర్మసంస్థాపనార్థాయ
సంభవామి యుగే యుగే || ౩౧ ||
ఆర్తాః విషణ్ణాః శిథిలాశ్చ భీతాః ఘోరేషు చ వ్యాధిషు వర్తమానాః | సంకీర్త్య నారాయణశబ్దమాత్రం
విముక్తదుఃఖాః సుఖినో భవంతు || ౩౨ ||
కాయేన వాచా మనసేంద్రియైర్వా బుద్ధ్యాత్మనా వా ప్రకృతిస్వభావాత్ | కరోమి యద్యత్ సకలం పరస్మై నారాయణాయేతి సమర్పయామి || ౩౩ ||
|| ఇతి శ్రీవిష్ణోర్దివ్యసహస్రనామస్తోత్రం సంపూర్ణమ్ ||
